مش عارفه انا بجد مش حاسه بحاجه خالص اتجاه اى حاجه وايام الامتحانات بتعدى عادى زى كل يوم وكمان ممكن اكون مش بحس بيها بقيت بفكر فى حاجات كتير اووى مش ليها اى علاقه ببعض وفى الاخر الاقى نفسى بعيط ....واسكت ..شويه يكون عندىاحساس وحش يعنى بكون خايفه ومخنوقه ومش عاوزة اتكلم .. وساعات اكون فرحانه وسعيده اووى بسبب حاجه تافهه اووى وممكن تكون هبله جدا بس بتفرحنى وبنسى كل حاجه واضحك بس ...وفى اغانى كتير بتكرر فى دماغى وتكرر وفى الاخر بكون هتجنن واعرف سمعتها فين او مين اللى غنها بس برضه انا كمان بكررها وبقولها بصوت عالى حتى لو كلماتها مش واضحه يعنى ساعات بعمل كدا وانا مروحه والناس تحسبنى مجنونه بكلم نفسى ..بس والله بكون مبسوطه برضه ....وفى ايات قران كتير على بالى الايام دى وبتفكرنى بحاجات كتير ..
الامتحان اللى فات وانا داخله شوفت بنت بتعيط رحت كلمتها وخلتها تضحك وتنسى كل حاجه وتدخل الامتحان ولما خرجت لافتها فرحانه اووى ان الامتحان جااى حلو و فرحاتنى اووى لما لاقتها مبسوطه مش عارفه ليه فرحت انها كانت بتضحك رغم انها مش صحبتى ولا حتى ممكن اقول عليها زميلتى بس كنت عارفها كدا ويومها دعيتلها ان ربنا يسعدها ويفرحها ليه مش عارفه بس قبل ما انام افتكرتها وضحكت كان شكلها حلو وهى بتضحك كدا :) ربنا يسعدها ... من فترة كان فى اعياد ميلاد كتير وافراح كتير كنت كل مناسبه تيجى اروح اشترى ورد الوان كتير وشكله يكون حلو حتى لو وردتين بس بحس ان الورد بفرح اى حد و فى اى وقت ..افتكر انى مرة كنت بعيط عشان موقف حصالى وكنت واقفه مع صحابى لقيت واحده راحت جابت ورده من محل كان جمبنا وقالتلى خدى كان شكل الورد عادى وبسيط اووى قالتلى انا حسيت انها شبهك الحقيقه مش فهمت اقصدها ايه بس بالمرة مش اهتميت فرحت بالورده اووى حسستنى باحساس حلو .....
انا عاوزة علبه الوان ويكون فيها الوان كتير اووى وكمان نفسى فى اجنده شكلها حلو او دفتر كبير يكون لونه بمبى او بنفسجى ...ممم وكمان نفسى فى ورد لا باقه ورد كبيرة اووى فيها ورد بمبى و بنفسجى واحمر وابيض واخضر ..فيها كل الالوان ..بجد نفسى اووى فى الحاجات دى مش عارفه ليه بس امبارح كنت بشترى ورق واقلام للامتحان من المكتبه عجبنى اووى قلم لونه بمبى واستيكه لونها ازرق اووى وشكلها كان حلو ...اخدت القلم البمبى بس بعدين لقيت ان مش هينفع اكتب بيه فى الامتحان ..و وعدت نفسى انى هجيبه فى اخر يوم فى الامتحان يعنى وقتها اكتب به براحتى ويكون معايا على طول ....
مش عارفه بجد مالى الايام دى نفسى فى حاجات بسيطه وهبله وممكن تكون كانت من زمان ولسه عندى بس برضه نفسى فيها اووى
حاجات غريبه وعجيبه وافكار مجنونه وكلام كتير ودموع وضحك وكل الحاجات دى فى وقت واحد ونفس اللحظه بكون بعيط وفى نفس الوقت بضحك وفى نفس الوقت بحلم انى بطير ويكون نفسى فى ايس كريم بالفانليا وشكولاته بالبندق ...
توقفت الايام الماضيه عن الكتابه فى يومياتى و فى المدونه بكرر كلمات قديمه ولا تجديد ولا اى شىء ... بعد 8 ايام هكمل 17 سنه و هو المفروض اكون سعيده ولا حزينه ...حتى الان لا مشاعر جديده ولا اى شىء ..حتى كلماتى صارت باهته اكتفى بقرائتها وتعديلها .. ممكن اكون مخنوقه بعض الشىء لان الاجنده باقى فيها صفحات قليله جدا او ربما انتهت واعلنت اكتملها واحتوائها على كل شىء .. بالفعل ربما .....
ايضا اعتذر للعاميه فى كلمات كثيرة ومشاعر لم اكتشف معنى لها فى القاموس العربى و العكس ايضا كلمات عربيه ليس لها معنى فى العاميه او معنى لماكتشفه بعد .....
فليظل القاموس العاميه والعربيه فى جهتين مختلفتين ولكن يظلوا امام عينى :)Gehad Mousa
